英超:利物浦速攻吼半大

利物浦速攻吼半大白禮頓XL碼草地遇強輸蝕英超周六早場，白禮頓主場迎戰利物浦。紅軍飽受傷病問題困擾，尤以後防問題最嚴重，領隊高普採取以攻代守，今仗作客英超球場面積最大嘅白禮頓，實行以速度取勝，喪攻海鷗大門，早早鎖定勝局，畀主力休息，留力下周歐聯搶分，佢哋近7場聯賽全開半場大，絕對追得過。（Now621及611周六晚8時30分直播）英超賽會對球場長闊冇明文規定，但大部分都係115碼乘74碼咁上下，不過，原來白禮頓嘅法爾馬球場面積係英超最大，堪稱「XL碼」，場區尺寸係116碼乘75碼，至於最細嘅係狼隊，只得110碼乘70碼。唔好睇少呢幾碼嘅分別，狼隊成日開細，就係球場細易於防守。白禮頓自己唔係擅攻球隊，咁大個球場對住傳統Big6就好蝕底喇，佢哋近5次聯賽主場鬥Big6全輸，而且全部開3球或以上，主場反而無優勢，呢5場有4場半場落後，亦有4場半場總入球2球或以上，包括上季尾鬥利物浦，半場落後1比2，全場輸1比3。沙拿搭祖達有料到利物浦遇上傷兵潮，後衞華基爾雲迪積克重傷收咧、祖高美斯、阿歷山大阿諾特、佐敦軒達臣及堤亞高艾簡達拿均有不同程度嘅傷患，紅軍上輪聯賽對李斯特城，就要由占士米拿串演右閘，法賓奴泰華利斯夥拍祖爾麥迪比鎮守中路，防守力減弱下，球隊索性以攻代守，全場攻門24射13中，結果大勝李斯特城3球，迪亞高祖達表現八面玲瓏。另一利好入球大嘅消息，係埃及射手穆罕默德沙拿周中歐聯對阿特蘭大正選復出，不過紅軍強攻嘅同時，防線依然錯漏百出，上場下半場突然崩潰連失2球導致輸波，依家歐聯出線未穩陣，今場最好快快奠定勝局，留力下周鬥阿積士。白禮頓上仗擊敗阿士東維拉，結束6場不勝走勢，前曼聯及阿仙奴射手韋碧克開齋，今場或可以攻破利物浦大門，1.5球半場大值搏。