歐冠盃:多蒙特尋仇主場收素

多蒙特尋仇主場收素今晚F組榜首之戰，多蒙特主場迎擊拉素。首循環交鋒拉素清脆贏3比1，但佢哋之後兩場分組賽僅獲1勝2和，而多蒙特就近3輪歐聯全勝排小組榜首，加上佢哋近5場歐聯主場都贏波，可望復仇成功，直接捧主勝。（Now645、有線662及602台周四凌晨4時直播）艾寧夏蘭特腳風甚順多蒙特歐聯經驗豐富，首輪分組賽輸畀拉素確有冷味，但「蜜蜂兵團」好快重拾水準，近3場分組賽全勝轟入8粒失0球，表現攻守兼備。王牌前鋒艾寧夏蘭特今屆歐聯已射入6球，包括首循環對拉素都有士哥，盡顯「歐聯魔童」本色。再者多蒙特今場只要贏波，就提早取得出線權，到時可放番精神落聯賽，值得睇高一線。拉素4場分組賽2勝2和叫做不敗，但2場勝仗皆屬主場出擊，反觀作客仲未贏過，今場造訪同組最強對手多蒙特，相信會以1分做目標。事實上拉素領先第3位嘅布魯日4分，就算今場輸波，仲有下輪主場對布魯日嘅關鍵戰，爭出線形勢上佔有主動權，上輪聯賽不敵烏甸尼斯難免打擊士氣，今仗決心同氣勢都唔及多蒙特，捧主勝為佳。