歐霸盃:些路迪無心戀戰益晒ＡＣ

些路迪無心戀戰益晒ＡＣ歐霸盃H組賽事，2哥ＡＣ米蘭主場迎戰些路迪。包尾大幡些路迪已提早出局，無心戀戰隨時收起主力，加上佢哋喺今屆歐霸盃經常大敗，ＡＣ肯定搶攻爭勝博出線，直取讓球主勝。（Now645、有線661及601台周五凌晨1時55分直播）提早出局或收起主力些路迪一向都係山寨王，打親歐洲賽即刻現晒形，今屆亦唔例外，先喺歐聯外圍賽被踢出局，轉戰歐霸盃亦未見改善，今屆4場分組賽只得1和3負，3場敗仗均至少輸2粒，包括連續2仗對布拉格斯巴達都輸1比4，表現慘不忍睹。由於些路迪喺聯賽落後死敵格拉斯哥流浪11分，既然喺歐霸盃已經提早畢業，梗係專心打聯賽好過，今場例行公事出副選Hea踢唔奇。另一邊廂，2哥ＡＣ只領先第3位嘅布拉格斯巴達1分，後者今輪要硬撼榜首里爾，至少會有1隊失分，倘若ＡＣ今仗贏波，出線機會大增，就算王牌伊巴謙莫域因傷倦勤，仍有列比錫及巴謙戴亞斯擔大旗，攻力有保證。睇埋兩軍近3次交手，ＡＣ贏晒之餘，全部都贏2球或以上，今仗再大勝唔難，讓球主勝好路。