勝利首爾爭出線大火併亞冠盃E、F組周四晚上演最後一輪分組賽，其中E組生死戰，墨爾本勝利、FC首爾正面對撼爭1個出線席位；FC首爾雖然和波已肯定晉級，不過佢哋近兩場分組賽失5球，後防甩漏多，對住非勝不可嘅勝利，捧2.5球大盤最穩陣。（Now671、有線652及612台周四晚9時直播）目前E組形勢，FC北京5戰全勝篤定首名晉級，包尾清萊聯已無緣出線，排第2嘅FC首爾暫以2分領先墨爾本勝利，換句話說首爾今場唔輸已經可以攞到另一個出線席位，不過首爾對上2場分組賽1和1負，其中1比2輸畀當時仲未攞到分嘅清萊聯，表現開始有疲態；勝利想出線今場一定要贏波，佢哋上場對清萊聯上半場一度領先2比0，一旦搶攻威力唔可以睇小，今場相信會有唔少入波出現，捧大最好路。