德甲:首都打吡柏林聯受讓好路

首都打吡柏林聯受讓好路今晚德甲爆發首都打吡，哈化柏林主場對柏林聯。哈化柏林近況一般，近8場只贏1場，今季主場仲未開齋，相反柏林聯狀態大勇，近8戰4勝4和保持不敗，今場仲有得受讓，梗係揀讓球客勝。（周六凌晨3時30分開賽）麥斯古斯入球停不了今次只係德甲史上第3次首都打吡，皆因自東西德統一以嚟，柏林聯上季先至第1次升上德甲，上季兩循環各贏1場，首循環柏林聯主場贏1比0，次循環哈化柏林主場贏4比0。哈化柏林近8場只贏得1場，嗰場係11月頭作客大勝奧格斯堡3比0，點知無以為繼，近2場先後以2比5不敵多蒙特及0比0悶和利華古遜，最大問題係今季主場仲未開齋，4戰1和3負只入得4球，由阿仙奴借入嘅古安杜斯，仍然未能為球隊帶來新衝擊。相反，柏林聯新簽嘅前鋒麥斯古斯上周又入2粒，今季已累積射入6球，助球隊同法蘭克福打成3比3，球隊今季踢9場入21球，同多蒙特一樣，只比拜仁慕尼黑少，今場作客受讓，讓球客勝筍到爆。