英超:李斯特城劈錫博反彈

李斯特城劈錫博反彈上輪聯賽倒灶不敵富咸嘅李斯特城，今晚作客包尾大幡錫菲聯。錫菲聯今季英超輸波率達9成，球員士氣同信心跌到谷底。李斯特城上周中歐霸半隊冇出發，留力博呢場，客Ｗ抵玩。（Now621周日晚10時15分直播）上季英超贏盤率最高嘅錫菲聯，3中堅戰術已被破解，球隊平均質素不足問題浮現，今季由利物浦簽入嘅新星利安比維斯達貨不對辦，加盟至今仲未開齋。錫菲聯攻守都唔掂，開季10場聯賽只曾打和同級對手富咸，其餘9場輸晒，變成輸盤率最高球隊，10戰只得1分亦造出英超史上最差開季紀錄，證明同一眾列強有頗大實力差距。李斯特城近期英超連輸2場，但今輪前仍排第4位，佢哋喺主力中堅蘇恩古受傷下，近期防線的確有漏洞，不過以錫菲聯疲弱嘅攻力，李斯特城要應付仍然游刃有餘。「狐狸」喺歐霸提早出線，所以上周中對索爾亞有半隊主力冇飛去烏克蘭，擺明留力今場，加上佢哋近5場聯賽作客除不敵利物浦外，其餘4場都贏波，今場有力反客為主。