英超:利物浦睇定踢半和好路

利物浦睇定踢半和好路2020/12/06文:工廠仔今晚英超尾場矚目戰，傷兵滿營嘅利物浦主場迎戰狼隊。「紅軍」今季飽受傷兵問題困擾，尤其防線更屬重災區，巴西門神艾利臣比加又成最新一員傷兵，領隊高普或以較保守戰術迎敵。狼隊亦有王牌魯爾占美尼斯缺陣，既然雙方都以穩為先，半場和值博。（Now621周一凌晨3時15分直播）利物浦兩位中堅華基爾雲迪積克同祖高美斯重傷長抖，高普已盡力喺陣式上作出改變，彌補防線不足，法賓奴泰華利斯、尼達利菲臘斯同祖爾麥迪比目前表現尚算稱職，「紅軍」近英超6場不敗，當中5次上半場與對手打和，可見佢哋防線人腳不整下，上半場踢法以穩陣為主。狼隊遇強唔會亂攻利物浦門神艾利臣比加最近加入傷兵行列，愛爾蘭小將基利靴上周中歐聯已臨危受命，演出亦獲好評，不過英超比賽壓逼性更大，相信高普會加重力度保護防線，希望靠穆罕默德沙拿及沙迪奧文尼等前鋒伺機突擊，上半場未必急於取得優勢。狼隊向來遇強愈強，依靠嘅就係穩健防守同銳利反擊，可惜王牌魯爾占美尼斯上場頭部重創要缺陣，狼隊火力勢必大為削弱，作客晏菲路唔會亂攻，睇怕上半場兩軍都唔敢輕率主攻，半和機會頗高。