曼聯同福仔傾續約　周薪加到30萬鎊英國傳媒報道，曼聯近日打算與拉舒福特展開續約談判，周薪由現時20萬鎊加到30萬鎊(約314萬港元)，杜絕歐洲各豪門進行挖角，讓福仔安心留喺奧脫福。拉舒福特係曼聯嘅「親生仔」，愛錫佢係應份嘅，所以人工待遇一定要好，英國《每日郵報》及《每日星報》報道，福仔同曼聯合約到2023年屆滿，會方睇好佢明年夏天代表英格蘭出戰歐國盃會有出色表現，身價將繼續上升，到時會吸引多間頂級豪門問價，因此曼聯打算做好準備，同佢續約兼加人工。23歲嘅福仔於2016年首次為曼聯上陣，至今上陣234入79球，而場外嘅福仔係慈善大使，佢為數百萬貧童解決饑餓問題，日前獲國際足協頒發FIFA基金會獎，因此曼聯高曾活華特準備開出豐厚條件，畀福仔安心留隊。