英總盃:曼聯速斬屈福特

曼聯速斬屈福特第3圈撞正私房菜啱啱喺英聯盃4強被踢出局嘅曼聯，英足盃第3圈賽事主場對屈福特，紅魔鬼主帥蘇斯克查一向對大小賽事都非常重視，皆因希望盡快取得執教曼聯後首個冠軍，曼聯上屆打入英足盃4強，今屆當然希望再進一步，遇正「私房菜」夠殺。曼聯近7次主場對屈福特全勝，其中6次上半場領先，揀半場主勝。（周日凌晨4時開賽）相對英聯盃，英超球隊都較為重視歷史較長嘅英足盃，「蘇B」2年前執教曼聯後，一直渴望捧盃，藉以證明自己領軍實力，反駁批評聲音，所以「紅魔鬼」踢盃賽鬥心一向有保證，上季歐霸盃、英聯盃、英足盃都進身4強。曼聯今季4線作戰，英超踢少一場下同榜首利物浦同分，另邊廂由歐聯轉戰歐霸盃32強，周中英聯盃4強以0比2不敵曼城出局，值得留意嘅係，「蘇B」正係當年三冠王成員，佢唔會因為要爭聯賽而盃賽留力，為咗增加捧盃機會，喺英聯盃出局後，今場英足盃會更加肉緊，預料曼聯可以速勝過關。「大黃蜂」作客戰績曳爆「大黃蜂」屈福特今季降落英冠後，表現一般，近8場作客只曾一勝，近兩場作客都輸波收場。「大黃蜂」踢盃賽表現更加令人失望，今屆英聯盃作客英乙球隊紐波特郡都輸1比3，上半場已經落後兩球，擺明冇心爭盃，更何況今場對手係狀態同實力高幾班嘅曼聯，相信屈福特無力招架，紅魔鬼夠料半場搞掂。