德甲:萊比錫鐵壁細鍊多蒙特

萊比錫鐵壁細鍊多蒙特德甲前列大戰，RB萊比錫主場惡鬥多蒙特。RB萊比錫今季改以銅牆鐵壁打拚，14場聯賽只失9球，近4場德甲全部零封對手，「蜜蜂兵團」多蒙特雖然擅長進攻，但艾寧夏蘭特受傷後未入過波，作客RB萊比錫又例少交收，今場捧2.5球入球細。（周日凌晨1時30分開賽）未計周六凌晨賽果，RB萊比錫只落後拜仁慕尼黑2分排次席，雖然入波唔多，但論防守穩健程度比拜仁更好。萊比錫上周聯賽作客以1比0擊敗史特加，連同歇冬前3仗，已經連續4場保持不失，今季14戰只失9球，係德甲防守力最佳球隊，如果單計主場仲厲害，7戰只失3球。萊比錫後防幾名戰將表現出色，其中法國新星烏柏美卡奴更獲得利物浦領隊高普青睞，此子今季德甲平均封阻全隊最多，場均解圍亦只落後同胞伊巴希馬干拿迪排第2。喺迪姆華拿轉投車路士後，RB萊比錫踢法改為高度壓迫及全場走動，左翼衞安祖利奴轉守為攻能力，亦係教練拿高斯文嘅一大殺着。夏蘭特傷愈後未開齋多蒙特今季略為令人失望，不敵下游球隊科隆及史特加係過往少見，前鋒艾寧夏蘭特傷愈復出後未重拾射門鞋，加上過往聯賽作客萊比錫入球唔多，近4次全開2球或以下，今場寧捧入球細。