西甲:馬體會半場Ｗ包搞掂

馬體會半場Ｗ包搞掂西甲重頭戲仲有1哥馬德里體育會於主場迎戰畢爾包。馬體會前鋒蘇亞雷斯重拾射門鞋，協助「床單兵團」於聯賽連場報捷，而且啱啱喺西盃爆冷出局堅肉酸，急於反彈必定搶韁，遇上「客場蟲」畢爾包，半場主勝捧得過。（Now632周六晚11時15分直播）馬體會開咧後15場聯賽取得12勝2和1負、僅失6粒，除咗保持固若金湯嘅防守，早前確診新冠肺炎嘅王牌前鋒蘇亞雷斯病愈後立刻上力。「阿蘇」近4場聯賽入4粒，粒粒關鍵，包括上輪末段入波絕殺艾拉維斯2比1，呢位烏拉圭前鋒12場聯賽上陣入9球，同伊亞高艾斯巴斯等並列射手榜榜首，老而彌堅，令向來守強攻弱嘅「床單兵團」鋒線變得銳利。畢爾包作客腳軟畢爾包啱啱易帥，由前華倫西亞教頭馬些連奴接手，磨合需時，佢上任後首仗、即周中聯賽補賽與巴塞隆拿激戰輸2比3，耗力大未必能回得切氣。何況「巴斯克雄獅」一向主強客弱，今季聯賽9次作客，只得1勝3和5負，其中6次先失守，正宗客場蟲。反之，馬體會近4場聯賽全勝，其中3次喺上半場已取得領先優勢，甚為搶韁，半場主勝有買趁早。