英超:曼城回勇搶宮半場勝要捧

曼城回勇搶宮半場勝要捧2021/01/17文:Mic少英超周一凌晨曼城（圖）主場迎戰水晶宮，「藍月亮」近期狀態全面提升，各項賽事取得7連勝，今仗面對失波頗多嘅水晶宮，有望在半場已穩定勝局，半場主勝好路。（Now621周一凌晨3時15分直播）曼城暫排聯賽第3位，以4分落後曼聯但少踢一場，仍然係爭標熱門，今季新加盟嘅守將魯賓戴亞斯同「翻生」嘅史東斯表現穩健，令「藍月亮」可以無後顧之憂。縱使阿根廷前鋒阿古路因要隔離未能候命，但20歲新星菲爾科頓愈戰愈勇，可以孭起入波重責。近4場聯賽開半W「藍月亮」前線以速度見稱，而且入局頗快，今季16場聯賽有13場成功喺上半場入波，上場一球小勝白禮頓後，近4場聯賽全部開出半場勝，並且順利全取3分，今仗當然照辦煮碗，力圖喺上半場就奠定贏波基礎。水晶宮目前降班危機未算十分嚴重，但整體戰鬥力唔及曼城，中場主將伊比爾治伊斯又因違規入場觀看舊球會昆士柏流浪比賽，受到水晶宮內部處分，士氣受到影響，今場遇強恐怕半場都頂唔住。