英超:一劍封喉曼城半Ｗ發維

一劍封喉曼城半Ｗ發維現時聯賽失分最少嘅曼城，今晚主場鬥阿士東維拉。曼城雖然冇咗早兩季嘅霸氣，但低調咁慢慢上番次席，穩健後防配合一劍封喉嘅攻勢，令到「藍月亮」聯賽5連勝，而且佢哋入局極快，呢5場全部半場領先，相信今仗半場足夠KO維拉。（Now621周四凌晨2時直播）經過上半季頻頻失分後，曼城領隊哥迪奧拿改用穩住中後場嘅戰術，再向對手施以突襲，收到「一劍封喉」嘅良好效果。曼城球員平均質素始終較高，經過調整戰術同心態，表現慢慢穩定落嚟，呢啲亦係爭聯賽鬥大長途嘅重要元素。維拉球員狀態成疑藉住上輪4比0大炒水晶宮，「藍月亮」升上聯賽榜次席，只比榜首曼聯少2分仲少賽1場。哥迪奧拿今季重點栽培嘅菲爾科頓亦孭起入球重任，喺對白禮頓同車路士兩仗都有士哥，近幾場仲多咗位奇兵，就係德國中場根度簡，佢最近4場聯賽入3粒，加上史達寧同費倫托利斯等，曼城火力仍然可信。維拉受疫情影響，自1月2日後冇踢過聯賽，即使中間踢過一場英足盃，亦只係派遣青年軍落場，陣中球員康復程度令人懷疑，即使能夠派遣主力上陣，但狀態肯定大不如前。既然曼城近5場聯賽全勝，全部半場領先，今場可照辦煮碗。