西甲:格蘭納達專注防守維拉利爾捱細界

格蘭納達專注防守維拉利爾捱細界今晚西甲快車尾場，「黃色潛水艇」維拉利爾主場硬撼CF格蘭納達。雖然「黃潛」位居前列，但近期主場戰績認真一般；CF格蘭納達中後場傷兵滿營，今仗一定專注防守，而且兩軍近年交手例少波入，捧2.5球嘅入球細好過。（Now632周四凌晨4時30分直播）謝拉特摩蘭奴易被嘜死連同盃賽在內維拉利爾錄得4連勝，睇落幾威，不過要留意對手只係利雲特同冇咗伊亞高艾斯巴斯嘅切爾達，以及低組別球隊薩莫拉同特內里費，當中3仗係客場出擊，反觀佢哋近4仗主場僅得1勝3和，只入得4粒，戰績遠遜客場。「黃潛」射手謝拉特摩蘭奴雖然大勇，但球隊過於倚賴佢數胡，搞到目標太大容易被嘜死，佢位好拍檔柏高艾卡沙啱啱先好番，狀態未足今仗或先任後備，對進攻點都有影響。CF格蘭納達今季有驚喜演出，近期亦連贏兩場，但對手只係奧沙辛拿同乙組仔馬拉加之流，睇番佢哋進攻一向偏弱，單計聯賽踢咗18輪僅入21粒，係頭8位中入波最少球隊之一，何況中堅捷西斯華利祖今仗要繼續坐波監，兩閘尼達羅辛奴、科基亞及防中干拿倫斯均有傷在身，防線不整下會先鞏固防守，靠中場走多兩步破壞對手進攻。兩軍近5次交手有4次開2球或以下，一於捧細盤。