英超:曼聯平手盤秤仙啲 般費領軍打翻身仗

曼聯平手盤秤仙啲般費領軍打翻身仗今晚英超傳統大戰，阿仙奴主場硬撼曼聯。阿仙奴近期戰績回穩，但所贏對手多屬中下游球隊，係咪正式「歸位」仲有待證明；曼聯上輪意外輸波，為免畀曼城拋離，喺般奴費南迪斯領軍下誓打翻身仗，而且佢哋今季作客成績冠絕英超，平手盤捧得過。（Now621及611周日凌晨1時30分直播）阿仙奴早前聯賽3連勝，止跌回升，領隊阿迪達改用伊美路維及加比爾馬天尼利等新星收到奇效，不過這班小將開始出現疲態，前者上仗鬥修咸頓中途傷出，後者傷愈後狀態一般，阿迪達今場可能焗住要作出輪換。不過「兵工廠」嘅韋利安、尼高拉斯比比同尼基迪亞等人就唔爭氣，難得上陣卻表現平庸，導致近5場法定時間僅得2勝，其中3場更食白果，包括於英足盃以0比1不敵修咸頓衞冕失敗，上場聯賽雖以3比1反勝「聖人」成功復仇，不過隊長奧巴美揚因母親病重請假，雖然已重回大軍報到，但狀態成疑，「達Sir」亦表明未必畀佢踢正選。紅魔今季作客冠絕英超曼聯早前喺英足盃以3比2淘汰死對頭利物浦，後備落場嘅王牌般奴費南迪斯轟入美妙罰球，單計聯賽，呢名葡萄牙國腳個人頭33場英超入19球之餘，並交出14次助攻，最重要嘅係另一核心保羅普巴亦回勇，令「紅魔」戰力回升。佢哋周中主場倒灶不敵榜尾錫菲聯，未能重登榜首，為免畀曼城拋甩，相信球員會盡顯「魔性」，尤其佢哋今季屬英超「作客王」，10戰錄得8勝2和，其中7場更係反敗為勝，韌力同鬥心十足，平手盤坐和望贏。