西甲:夏神歸位皇馬大無畏 利雲特遇強唔會縮

夏神歸位皇馬大無畏利雲特遇強唔會縮西甲周六好戲，皇家馬德里主場迎戰利雲特。「銀河艦隊」上仗喺施丹確診無法領軍下，反而大勝艾拉維斯4比1而回，球員信心返晒嚟，利雲特係西甲其中一支極富娛樂性球隊，今仗對碰預期會合演一場入球大戰，中位數3.5球嘅入球大捧得過。（Now632周六晚11時15分直播）皇馬於1月中陷入低潮，聯賽作客奧沙辛拿遭悶和0比0後，於西超盃及西班牙盃接連輸波，6日內連失2盃，導致主帥施丹再度出現帥位危機，7成3球迷認為佢要落台，而施丹更禍不單行確診新冠肺炎。點知柳暗花明，球隊於助教領軍下作客艾拉維斯，不但全取3分，更踢出近期代表作，相當神奇。賓施馬重拾射門鞋上輪西甲，皇馬作客大勝艾拉維斯4比1，近仗啞火嘅賓施馬重拾射門鞋成功起孖，中場卻奧斯交出2個助攻，莫迪歷亦貢獻1個助攻，最令球迷欣喜就係夏薩特，呢位比利時隊長上仗交出1入球1助攻，一掃近期陰霾，只要「夏神」持續交出好表現，皇馬攻力仍然可靠。利雲特近期於西盃及西甲保持6仗不敗，包括周中西盃以4比2擊退華拉度列，狀態甚佳。該隊踢法崇尚進攻，就算作客都唔會縮，踢法極富娛樂性，佢哋近3場全開4球或以上，預計今仗作客皇馬將會上演「入球騷」，入球大有計。