西甲:巴塞復仇半場吔包 美斯遇仇家必定搶韁

巴塞復仇半場吔包美斯遇仇家必定搶韁今晚西甲尾場上演西超盃決賽翻版戰，巴塞隆拿主場火併畢爾包。巴塞喺西超盃唔單止輸畀「巴斯克雄獅」，隊長美斯仲打人領紅出場冇晒面，仇人見面分外眼紅，呢位球王急於復仇必定搶韁，加上巴塞近期於聯賽例打閃擊戰，半場主勝咪錯過。（Now632及611周一凌晨4時直播）兩隊喺月中嘅西超盃決賽交過手，畢爾包踢到加時贏3比2封王，嗰場美斯傷愈復出冇盃捧之餘，仲愈踢愈躁，末段揮拳打向維拿利巴塊面，搞到佢攞到自己喺巴塞生涯嘅首張紅牌，幸最終只係被西班牙足總輕判停賽2場。美斯上仗刑滿復出即有入波，協助巴塞喺西班牙盃以2比1淘汰華歷簡奴，躋身8強，今仗聯賽再遇仇家，必定加多兩錢肉緊。另一中場法蘭基迪莊狀態亦弗，近5仗轟入3粒，就算老將布斯基斯坐波監亦冇有怕。畢爾包或「獲利回吐」畢爾包自主帥馬些連奴接手後，戰績全面反彈，更成功捧走西超盃，近7場取得5勝1和1負佳績，但要留意輸波嗰場，正正係聯賽首循環主場不敵巴塞2比3，嗰場美斯仲省兩粒添，小心佢哋「新帥效應」已過，連場報捷後「獲利回吐」。睇番巴塞近期出戰聯賽踢法搶韁，近6場聯賽獲5勝1和，而5場勝仗全部喺上半場已經取得領先優勢，其中4次更係先拔頭籌，可見主帥朗奴高文落咗「柯打」，叫球員趁對手未入局搶得就搶，預計今仗都會照辦煮碗，一開波即撳住砌，希望速戰速決，半場主勝有買趁早。