澳職:光輝大盤萬墨錯過 唔怕失波最緊要入得多

光輝大盤萬墨錯過唔怕失波最緊要入得多澳職周日有進攻「大」戰上演，開季即製造連場大比數嘅珀斯光輝，將會作客火力強橫嘅墨爾本城。光輝鋒線粒粒皆星，今場更有中場大腦迪亞高卡斯度強勢復出，教練加西亞一向主張進攻大過天，再追2.5球嘅入球大！（無綫85台周日下午3時40分直播）珀斯光輝今季最遲開鑼，但為趕賽程近期賽程頻密，今場係佢哋12日內第4場聯賽，之前3輪都係大手交易，3場賽事合共入10球兼失10球，近2場作客分別4比5不敵西部聯，以及1比2輸畀墨爾本勝利，教練加西亞早前表示：「只要我哋總比數係入多過對手1球，咁失幾多波都唔係問題。如果每場作客都入到4球，我唔相信每場都失5球。」墨城猛火有力對攻光輝攻擊鐵三角科拿路利、歷克迪亞高斯天奴同卡路阿利文圖都各有3球進帳，而且西班牙中場大腦迪亞高卡斯度今場將會復出，有呢個發電機在陣，球隊進攻力將更加強勁。尤其佢哋兩大星級後防施巴斯坦蘭甘同太田宏介仍然缺陣，以攻代守係唯一出路，光輝近5仗有4場總入球開3球或以上、3場開4球或以上，開大機會高唱入雲。墨城上季常規賽入49球，同FC悉尼並列澳職入球最多球隊，王牌前鋒占美麥卡倫上場開齋兼上演絕殺，對佢提升信心會有好大幫助，睇番佢哋喺地頭出擊多數以進攻踢法迎敵，估計今仗好大機會演入球騷。