英超:紅軍迎白禮頓追半和 搶分止瀉 睇定嚟踢

紅軍迎白禮頓追半和搶分止瀉睇定嚟踢英超今晚好戲，利物浦主場迎戰白禮頓。「紅軍」利物浦聯賽兩連勝，總算一掃近期陰霾，排榜下游嘅白禮頓今場到訪晏菲路，肯定會死守博1分。考慮到「紅軍」主場威力下降，近期多次開出半場和，要攻破白禮頓密集防線可能要等到下半場，今仗再敲半場和。（Now621周四凌晨4時15分直播）利物浦喺聖誕新年快車檔期一度進佔榜首，不過之後陷入低潮，前鋒「三叉戟」相繼失靈，一度經歷5場聯賽贏唔到波，期間更先後輸畀修咸頓同般尼，喺聯賽及足總盃兩鬥死敵曼聯，亦落得1和1負下場，於足總盃第4圈被淘汰出局；聯賽連場失分下排名急降，主帥高普及各戰將承受壓力愈來愈大。好彩「紅軍」前仗作客熱刺終於復甦，以3比1取勝，上場變陣派出梳頓沙基利同奧歷治正選上陣，效果出奇理想，同樣以3比1擊退韋斯咸。前鋒羅拔圖法明奴對熱刺一仗打破入球荒，翼衞阿歷山大阿諾特及箭頭穆罕默德沙拿亦有士哥，不幸係中堅祖爾麥迪比受傷宣告收咧，令球隊防線兵源問題影響搶攻意欲，中前場球員有所顧忌下預計今場唔敢亂攻，就以上場為例，「紅軍」即使贏波，半場都只係同韋斯咸互交白卷，等到換邊後先至發力。首循環對戰半和全和白禮頓上仗爆冷以1比0險勝熱刺，護級壓力稍有紓緩，但聯賽係長途戰，點都唔可以放鬆，對住實力秤先嘅利物浦肯定守住先。睇埋往績，首循環交手白禮頓以1比1逼和「紅軍」，上半場踢成0比0。利物浦上次主場輸畀般尼，晏菲路68場不敗佳績告一段落，因此主場已非無敵，加上佢哋近4次主場3次開出半場和，今場一於追多鋪。