英超:奇兵交鋒維拉讓唔起韋斯咸

奇兵交鋒維拉讓唔起韋斯咸今晚另一場英超尾場大戰，阿士東維拉主場鬥韋斯咸；兩軍今季都喺不被睇好情況下踢出超水準，韋斯咸最近3次對維拉未輸過，加上近4場作客取得3勝1和，計牌面呢場只係五五波，韋斯咸受讓當然值得捧場。（Now622周四凌晨4時15分直播）維拉、韋斯咸上季聯賽分別排第17、16位，僅僅成功護級，不過今季兩隊都有脫胎換骨演出。維拉季初贏過利物浦、李斯特城及阿仙奴等勁旅，並曾經登上聯賽榜首，未計周三凌晨賽事，佢哋排聯賽榜第9位，只比第4位嘅李斯特城少7分並少踢兩場，仍有機會爭入前4。韋斯咸上場雖然輸畀利物浦，但之前喺各項賽事錄得6連勝，戰績驕人，上場失利只因對手實力太強，料對球員信心影響不大。湯馬士蘇錫克着晒火韋斯咸今季成績起飛，箭頭查洛保雲及中場湯馬士蘇錫克成為最大關鍵，尤其後者自上年冬季轉會窗登陸英超後，至今已為「錘仔」攻入10個聯賽入波，包括今季射入7球，以一名中場嚟講效率超高；維拉中前場雖然都有奧尼屈堅斯及基亞利殊孭飛，不過拍埋「錘仔」一對好拍檔，極其量都係打成平手，計牌面維拉冇優勢可言，韋斯咸受讓必捧讓球客勝。