西甲:阿蘇弗爆馬體會W趁熱食

阿蘇弗爆馬體會W趁熱食今晚西甲獨腳戲，1哥馬德里體育會主場迎戰切爾達。馬體會近期多名球員確診新冠肺炎，但佢哋愈戰愈勇信心爆棚，烏拉圭神鋒蘇亞雷斯更腳風順到冇朋友，面對6場不勝嘅切爾達，主勝手到拿來。（Now632周二凌晨4時直播）切爾達近6仗不勝之前法達斯維都有疑問，點解馬體會咁鬼弗，個主W仲有1.5倍咁好分，原來佢哋近期多人中招，馬里奧靴莫素、恩歷克卡拉斯高、祖奧菲歷斯及新兵穆沙迪比利，先後確診新冠肺炎而需要隔離，連同捷比亞仍要坐波監，陣容不整。不過鐵血主帥施蒙尼最叻係激勵士氣，尤其喺逆境下，更要眾將咬緊牙關，正正係呢種精神面貌，成為馬體會愈戰愈勇嘅標誌，其中被巴塞放棄嘅射手蘇亞雷斯，為爭一口氣搏甩髀，近8次喺聯賽上陣入9粒，呢8場全部贏晒，若果再睇遠啲，近16場聯賽豪取15勝1負，輸嗰場係不敵死對頭皇馬，氣勢如虹，難怪逐漸甩開皇馬同巴塞。切爾達雖有王牌伊亞高艾斯柏斯傷愈復出，惟連同盃賽在內，近6仗只得2和4負未贏過，似乎中途接手嘅伊度亞度高特嘅蜜月期已過，睇番佢哋今季11仗聯賽作客，贏得1場咁大把，造訪皇馬、西維爾等強隊亦敗陣，遇強即屈。況且馬體會近5次主場出戰切爾達，取得4勝1和，今仗有力乘勝追擊，主勝有計。