西甲:皇馬上盤派利是 主場特醒 蝠星高照

皇馬上盤派利是主場特醒蝠星高照西甲周日大戰，皇家馬德里主場迎戰華倫西亞。「銀河艦隊」皇馬傷兵滿營，不過佢哋近期成績未見走樣，近4仗聯賽取得3勝；華倫西亞首循環雖曾大勝皇馬，但「蝙蝠兵團」作客成績甚差，今晚未必可以全身而退。既然皇馬近6次聯賽主場5次贏兩球或以上，深信皇馬主場威力非凡，讓1球/球半照捧上盤。（Now632及611周日晚11時15分直播）皇馬傷兵問題持續，有多達8名主力缺陣，不過佢哋可用人腳其實質素甚佳，前鋒賓施馬、卡斯米路同莫迪歷都係鐵膽，至於年輕球員雲尼斯奧斯祖利亞亦開始接棒擔大旗，後備席上兩位西甲經驗十足嘅艾斯高同馬些路都有落場機會，今仗仲有卻奧斯停賽刑滿復出，領隊施丹排陣都冇之前咁頭痛。「銀河艦隊」賽前再有好消息，隊長沙治奧拉莫斯接受左膝外側半月板手術後，已經喺屋企進行康復訓練，爭取於3月中復出，呢位「更衣室大佬」咁積極，對皇馬眾將絕對有正面作用，落場球員更加唔會偷懶，今次主場出擊當然希望可以擊退華倫，力爭3分。華倫西亞防線有隱憂「蝙蝠兵團」華倫西亞聯賽首循環憑卡路士蘇拿射入3個12碼，主場4比1大破皇馬，不過華倫今仗想再贏相當困難，事關佢哋只係門口狗，作客成績同主場比較有好大落差，華倫作客11戰僅得2勝4和5負，今場又有前鋒加美路確診，加上一對中堅文加拉、莫達迪亞卡拜養傷，另一年輕中堅曉高古拉蒙上仗作客畢爾包更加「擺烏龍」，難擔重任，要頂住皇馬絕對唔易。睇埋往績，皇馬主場數據超強，近6次聯賽主場5次贏兩球或以上，當中有4場比數係2比0，今場捧上盤之餘，不妨要埋2比0波膽，隨時有意外驚喜。