意甲:國米專注聯賽勝完再勝

國米專注聯賽勝完再勝意甲「雙藍大戰」國際米蘭主場對拉素，國米喺上周中意大利盃4強出局之後，惟有專注爭奪聯賽錦標，搶分決心更加強。至於拉素近期佳績有「水份」，以國際米蘭聯賽主場7連勝嘅強勢，今場有力擊敗拉素，直取主勝。（myTVGold301、Now638、有線601、614、654及661台周一凌晨3時45分直播）國際米蘭上場意大利盃4強次回合作客打和祖雲達斯0比0，兩回合計僅負1比2，雖敗不辱。由於國米已經緣盡今屆歐洲賽，加上意盃出局，今季唯一捧盃希望得番聯賽，向好方面睇，「藍黑兵團」可以專心踢好意甲，成績應該有保證。事實上，國米同榜首AC米蘭鬥得非常緊湊，絕對有機會反超前，當然前提係「藍黑兵團」必須保持贏波。國米近7場聯賽主場全勝，包括擊敗兩支勁旅拿玻里同祖雲達斯，前鋒盧卡古今季14個聯賽入球有10球來自主場，足見佢喺聖西路球場表現特別醒神，國米今場遇上拉素，值得睇高一線。拉素作客咪高估另一邊廂，拉素取得聯賽6連勝，表現亦相當唔錯，但要留意當中3場對手係下游弱旅帕爾馬、卡利亞里及費倫天拿，實在不宜高估。再睇埋拉素近5場聯賽作客僅兩勝，包括曾經作客不敵AC米蘭，今場再次去到聖西路球場比賽，面對實力同AC旗鼓相當嘅國米，隨時再次敗走。