日聯:櫻花格食格唔赦水手

櫻花格食格唔赦水手2021/04/06文:邪神日職獨腳戲橫濱水手主場迎戰大阪櫻花。水手上輪畀湘南比馬逼和，4連勝氣勢告終，反觀櫻花上仗主場擊敗鳥棲砂岩，打破對方今季不失球金身，士氣正盛，今仗作客硬撼水手有力搶分，而且櫻花近14次聯賽對水手，錄得9勝5和未輸過，完全係格食格，櫻花今場受讓勁好路。（有線661及601周二晚6時直播）近14次對賽未輸過前季日職盟主水手在澳洲籍主帥普斯迪高路帶領下，除咗開季首仗不敵超級球隊川崎前鋒之外，聯賽連盃賽7戰取得5勝2和，攻入17球，球隊踢法主動，擅踢前場壓迫戰術，好多時都能夠掌控比賽節奏。不過今場對手櫻花毫不輸蝕，而且星味更濃，老牌前鋒大久保嘉人今季大爆發，開季8場攻入5球，成為攻擊線重心，上仗迎戰開季至未失1球嘅鳥棲砂岩，以1比0贏波，不但終結砂岩不失球紀錄，更打破對方聯賽不敗身，櫻花贏波後亦進佔聯賽三甲，力追榜首雙雄川崎前鋒及名古屋鯨魚。兩隊交鋒多年，頗有格食格味道，櫻花近14次聯賽對水手，錄得9勝5和不敗，即使2019年水手當年奪冠，櫻花仍然可以喺聯賽「雙殺」水手，櫻花現處於上升時期，水手要打破宿命更添難度，櫻花今仗受讓，讓球客勝抵玩。