澳職:西悉流追打落水狗

  西悉流追打落水狗周五澳職獨腳戲，墨爾本勝利主場鬥西悉尼流浪者，主隊近期大地震，上場打吡戰慘吞7蛋後教練被炒魷，信心盡失；西悉流近況雖然唔算好，不過勝在有往績支持，為保季後賽資格必追打落水狗，上盤值捧。（周五下午5時05分開賽）勝利輸到慌炒教練上季常規賽排尾2、今季大換血嘅墨爾本勝利成績不似預期，踢咗16輪聯賽只得3勝2和11負，上場打吡戰因有阿達馬查奧爾上半場領紅牌被逐，結果人少打人多下淨吞墨爾本城7蛋，信心、士氣跌落谷底，主帥比貝拿賽後更被炒魷，由助教堅恩出任看守教練，不過堅恩同比貝拿同一鼻孔出氣，易帥只係換湯不換藥，要即時反彈絕對唔容易。勝利主將馬高洛查士同梳頓續養傷，阿達馬查奧爾又要停賽，戰鬥力大打折扣。西悉尼流浪者近5場聯賽3和2負，狀態唔算理想，好彩佢哋季初搶到唔少分數，依家排聯賽榜第6位，仲有機會爭入季後賽。西悉流今季18場聯賽只有2場冇入波，進攻效率唔曳，而且佢哋對上3次鬥勝利全部贏晒，包括今季首循環主場贏2比0，作客一樣信得過，上盤值捧。