友誼賽:波蘭俄羅斯和波Encore

波蘭俄羅斯和波Encore2021/06/01文:工廠仔歐國盃決賽周前嘅熱身賽陸續展開，周三凌晨波蘭會喺主場同俄羅斯「拍跳」，兩隊都係決賽周分子，今場作為熱身當然以試陣為主，球員落到場會避重就輕，預料羅拔利雲度夫斯基等主力都唔會踢足，今場好大機會以「和」為貴。（有線602及662台周三凌晨2時45分直播）羅拔仔怕傷只踢半場波蘭已經決選26人大軍名單，王牌射手羅拔利雲度夫斯基自然成為焦點，佢喺4月初曾經受到膝傷困擾，好彩傷愈後喺拜仁慕尼黑最後4場賽事都有上陣，狀態得以保持，但為免決賽周前再出問題，賽前消息指佢可能只會踢半場。波蘭領隊保羅蘇沙年初先至上任，3場世盃外只有1勝1和1負，仍然處於試陣階段，今次主場出擊亦贏面唔高。作客嘅俄羅斯目前選出30人大軍，領隊查切索夫仲要剔走多4個球員，今場好大可能係畀邊緣球員爭取入選最後機會，多位年輕球員有望披甲，試陣嘅用意就更加明顯。波蘭同俄羅斯對上兩次交鋒都係打和，可見兩隊勢均力敵，相信今場再開和波機會甚高。