紅軍上盤橫「素」千軍

紅軍上盤橫「素」千軍
 
歐聯B組賽事，利物浦飛到去瑞士惡鬥巴素利，預計可以平安袋晒3分，因為主隊人腳唔齊之餘，戰鬥力亦比起前幾屆失色，紅軍客勝得1.82倍已見莊家信心，但平手、半球捧上盤更加穩陣。（周三7，有線61及201台周四2:45am直播）

巴素利近期喺本土賽事都係普普通通，瑞士盃贏實力一般嘅溫特圖爾4:0，另外喺瑞超擊敗名不見經傳嘅華杜斯3:1，但對住名氣相當嘅杜安就只能夠賽和1:1，陣中主力舒哈喺該仗被調離場時，曾直接質問教練保羅蘇沙點解換佢，雖然兩人事後向傳媒表明冰釋前嫌，而且一切都以球會利益做大前提，但相信已經傷咗和氣。

森美爾成後防計時炸彈

事實上，保羅蘇沙都係今屆先任教巴素利，但係喺年初嘅時候，球會已經將最寶貴嘅資產穆罕默德沙拿賣咗俾車路士，而新球季重點引援竟然係前阿根廷國腳森美爾，呢位中堅畢竟已過高峰，隨時成為巴素利後防嘅計時炸彈。另外，曾效力利物浦嘅菲臘迪根就因為受傷嘅緣故，是役唔可以倒戈，但係日本外援柿谷曜一朗就可上陣。

利物浦踢歐戰有運仔

利物浦最近冇乜贏波，英超先輸俾韋斯咸，另外臨尾香俾愛華頓追和，而聯賽盃就同米杜士堡射咗一場馬拉松式12碼，最後驚險晉級，不過紅軍對上一次贏波正正係歐聯B組第一輪賽事，當時佢哋喺最後一刻憑隊長謝拉特射入12碼，以2:1力克盧多格德斯，似乎喺歐洲賽有啲運仔。

史杜列治或隨軍出征

大家咪以為利記呢排乏善足陳就睇低佢哋，事關一班傷兵已經好番晒，一度傳出要唞耐啲嘅佐敦軒達臣同埋菲臘比古天奴已經喺愛華頓一役披甲，而史杜列治亦有跟大軍出征瑞士，預期今晚會夥拍巴洛迪利攻堅，再配以史達寧組成黑三煞，火力絕對令人期待，不過買波求穩陣，足智彩有讓球盤提供，利物浦讓平手、半球上盤最著「素」。