柏雷素爾勝望濃捧上盤|東方日報

今晚日職焦點賽事，柏雷素爾主場迎戰神戶勝利船，「4哥」柏雷素爾連盃賽在內豪取3連勝，已經走出早前低谷，加上近年碰頭食住神戶勝利船，讓得起平半，一於捧上盤。
（有線665及605台周六晚6時直播）

及時轉勢豪取3連勝
柏雷素爾之前各項賽事，一度6場僅1勝，幸好上月底及時反彈，連同盃賽在內，近3仗取得全勝兼狂轟10球，包括聯賽作客大勝北海道札幌岡薩多6比1，球員信心爆棚。儘管年輕前鋒細谷真大仍要出戰U23亞洲盃未歸隊，但仲有馬菲奧斯沙維奧助陣，配合頻有助攻嘅小屋松知哉，火力未減。

至於星味十足嘅神戶勝利船，雖然連盃賽獲兩連勝，不過大勝殘陣出擊嘅北海道札幌岡薩多4比1，明顯欠說服力，上仗日皇盃反勝日丙球隊富山勝利3比2，要喺末段連入兩球先至絕殺對手，幸運成分居多，球隊表現飄忽，難怪仍然敬陪末席。何況雙方近4次交手，柏雷素爾取得3勝1負，格食格之下再贏唔奇。