科娜：墨爾本勝利當起要追

中岸水手態沉攻力弱
排緊澳職第二位嘅墨爾本勝利開咧至今八戰不敗，狀態大勇，今場喺中立場對住中岸水手，當然捧得過啦，因為水手嘅近況實在差到冇眼睇，攻力又曳，俗語都有話，寧買當頭起，墨爾本勝利讓平半，梗係撐上盤啦！

（有線64及203台周五下午4時40分直播）

中立場踢 主隊冇着數
墨爾本勝利依家喺積分榜上落後榜首嘅珀斯光輝4分，今場爭勝心無庸置疑。雖然勝利今季聯賽作客仲未開齋，但今場比賽喺中立場地新南威爾斯北悉尼橢圓球場踢喎，中岸水手連主場之利都冇埋，以勝利近排嘅勢頭，絕對有機會取得「客場」首勝﹗

中岸水手今季澳職開咧以來八周賽事入面已經輸咗四場，最慘嘅係一共只入得五球，攻力弱得可憐，上場雖然同紐卡素噴射機打和，但論球隊嘅表現根本唔值得和波，輸波先合理，今場對住愈戰愈勇嘅墨爾本勝利，又有後衞賓特格菲斯因傷缺陣，受讓都制唔過，勝利上盤值得捧場。