蘇斯黑柴：利華兇狠同班霸駁火

246次射門多過拜仁
周末德甲重頭戲，首選係一哥拜仁慕尼黑主場對三哥利華古遜，拜仁係德甲班霸，實力超群兼無後顧之憂，主場必然搶攻求勝，不過要數當世最唔驚拜仁嘅教練，首推利華古遜少帥羅渣舒密特，佢話等對拜仁等到頸長，今晚絕對唔會龜縮，下定決心以快打慢博爆冷，無論佢成功與否，最低限度會為大家提供一場對攻好戲，今場入球大細中位數調整到3.5球都冇有怕，推介2.05倍大盤。

（有線61、64、201及203台周日凌晨1時30分直播）

利華古遜目前以23分排第三，落後拜仁10分之多，入球25個僅次於拜仁，同次席嘅禾夫斯堡並列第二，不過講到進攻，其實佢哋比拜仁更狠，因為踢咗13輪聯賽，利華嘅射門總數達到246次，排德甲第一，比起拜仁仲要多出3次，今季加盟嘅新帥羅渣舒密特推行嘅開波即搶作風，令綽號「德甲藥廠」嘅利華作風由荏弱變得強悍。

羅渣舒密特曾大炒哥帥
今仗係羅渣舒密特執教利華後首次挑戰拜仁，但佢係最唔怕拜仁嗰個，皆因上季佢執教奧地利球會薩爾斯堡，就曾經喺歇冬期同拜仁踢過熱身賽，結果薩爾斯堡雖然作客，卻由開波搶到尾，打到當時陣容不整嘅拜仁全無還擊之力，最後薩爾斯堡大勝三球，令拜仁主帥哥迪奧拿亦為之驚歎。今晚係羅渣舒密特首次喺德甲賽場挑戰拜仁，佢話期待已久，會繼續開波即搶作風，唔會畀拜仁搓定嚟踢，仲豪言有信心攞到分數添！

利華上輪啱啱喺萊茵河打吡戰大炒科隆五個一皮，氣勢如虹，不過勇還勇，球隊喺羅渣舒密特推行嘅壓逼踢法下，防線暴露大量空位，令佢哋嘅失球數字成為前列五強最多嘅一隊，加上守將柏柏杜普路斯、古利奧當拿迪同連拿迪斯都因傷缺陣，防線實在令人擔心。

拜仁陣中仍然傷兵滿營，不過球隊陣中多名副選都有頂級質素，成績未受影響，佢哋上仗作客只能小勝弱旅哈化柏林，成班球員賽後都話表現唔收貨，今晚返主場遇勁敵當然希望踢番場醒神好波，何況佢哋歐聯已經篤定小組首名出線，唔使分心下可以同利華放手一拚，今仗激戰可期。