笛子波童：菲律賓10連輸泰可怕

東南亞錦標賽今晚上演4強首回合，泰國作客鬥菲律賓，菲律賓世界排名雖然高過泰國16位，但自91年起菲律賓對上10次對泰國竟然全部輸晒，真係見到泰國國旗都怕怕，波童信往績揀泰國先拔頭籌，捧1.95倍客W。

（now 670周六晚8時直播）

東南亞錦標賽賽制夠晒特別，分組賽今屆喺越南及新加坡舉行，去到4強及決賽就會採取主客兩回合制。今場對賽雙方踢法其實好相似，同樣以地面組織、短傳入滲為主，不過菲律賓陣中除以効力美職肯薩斯體育會嘅中場史迪奧保較具卡士之外，其餘球員質素一般，對住個人技術較佳嘅泰國自然被剋死。翻查紀錄菲律賓自91年起計連續10次對泰國都落敗，合共失咗42球，最近一次係喺上月初熱身賽淨吞3蛋，相隔短短一個月，實在睇唔到菲律賓有咩本錢可以打破此宿命。

泰國近年喺國際賽成績冒升，國內球會武里南聯、春武里喺亞洲球會級賽事亦有好表現，球隊最後一輪分組賽冇話因為篤定出線而留手，仍派強陣出擊輕取緬甸，足證爭盃決心，只要發揮水準作客一樣可以照贏。