張健峰：皇馬同花順 炒起切爾達

狂鋒士哥停不了！
近期贏到開巷嘅「銀河艦隊」皇家馬德里，今晚西甲主場迎戰切爾達。皇馬周中西班牙盃主場對低組別嘅哥拿尼畀主力休息，依然輕描淡寫大勝5:0。今場C朗及賓施馬等球員養精蓄銳，對住狀態低沉嘅切爾達，再贏1場難度唔大，皇馬讓2球嘅1.7倍「讓主」值得捧場。

（now632周日凌晨3:00直播）

皇馬開季戰績奇差，5場只得1勝，好在之後迅速上力勝仗連連，至今累積17場連勝，刷新球會史上最長連勝紀錄之餘仲上埋榜首，隊波信心同士氣均處於頂峰，喺巴拿貝出擊甩拖機會微。雖則艾斯高紅牌上訴失敗今仗要停賽，好在皇馬「同花順」C朗、賓施馬及占士洛迪古斯等個個著晒火，要贏3、4球都唔係問題。

網上流傳新作客波衫
皇馬月中要飛去摩洛哥踢世冠盃，佢哋尋日公布參賽22人名單，除咗重傷嘅莫迪歷冇份之外，其餘主力悉數在陣，連養傷多時嘅謝斯洛迪古斯都喺度。為咗可以安心「上路」，皇馬肯定想將連勝走勢一直維持，以西甲榜首身份出戰世冠盃，今場點會留手。順帶一提，網上流傳皇馬下季新波衫，2件作客傳聞會變淺灰色同深藍色，唔知粉絲們啱唔啱睇呢？

切爾達態沉鋒力差
切爾達早前爆大冷作客擊敗巴塞隆拿，係威過一排，可惜近期戰績唔多好，連埋周中西班牙盃輸畀西乙嘅拉斯彭馬斯，錄得3連敗士氣差勁。佢哋鋒力亦認真麻麻，近4戰入得1球，去到巴拿貝想入波都難，雖然佢哋防守力喺西甲算係唔錯，但係久守必失，對住近排無堅不摧嘅皇馬點頂得住呀？