法達斯維：5路盟主 晒冷保江山

衞冕大業舉步維艱
西、意、法、荷、葡冠軍之夜大晒冷！正所謂創業難，守業更難，各大聯賽衞冕球隊今季均舉步維艱，尤其係上季力壓皇馬同巴塞於西甲封王嘅馬體會，以及巴黎聖日耳門（法甲）、阿積士（荷甲）要奮力追趕勁敵，賓菲加（葡超）同祖雲達斯（意甲）嘅領先優勢亦唔多，今晚五支上季盟主齊齊出擊，為搶分一定搏盡，勢必好睇過戲。

馬體會大鵬展翅轟炸黃潛
今晚西甲焦點賽事，衞冕嘅馬德里體育會主場迎戰維拉利爾，前者貴為全歐第一「空軍霸王」，頻頻利用死球戰術施展高空轟炸數胡，今仗力爭主場九連捷，不過「黃色潛艇」四連勝勁弗，癲鳳鬥狂龍下隨時合演入球騷，斯維力撐大盤。

（now 632周一凌晨2時直播）

馬體會在主帥施蒙尼帶領下保持一貫鐵血本色外，佢哋層出不窮嘅死球戰術，以高空轟炸撞散對方防線取得士哥。睇番馬體會於十四場聯賽入咗二十七粒，當中有十九球經由死球製造，冠絕五大聯賽榮升全歐第一「空中霸王」，文迪蘇傑、高甸等頂上功夫一流，與「鬥牛國」新貴佐治高基嘅罰球配合發揮到極致，難怪「床單兵團」已有十五個頭槌入波喇！

維拉利爾作客鬥攻
維拉利爾連盃賽近四場贏晒，其中兩名生牯仔韋圖同謝拉特摩蘭奴頻有士哥博上位，「黃色潛艇」近六次造訪馬軍有五次開大，呢場大盤有1.95倍值得捧場。