對賽旺和波山度士受讓筍|東方日報

巴甲今輪壓軸戰，兩支力爭下屆南球盃入場券嘅球隊對碰，巴拉干天奴紅牛主場鬥山度士。今場係巴甲新貴同傳統力量嘅角力，大家都唔想輸，睇番雙方近7次交手，竟然有6次打和，鍾意扒冷嘅朋友，可以直取和波，穩陣嘅就揀山度士讓球客勝。（周二早上7時開賽）


巴拉干天奴紅牛自2019年奪得巴乙冠軍升班，2020年同2021年喺巴甲都喺上游完成賽事，取得南美賽事資格，2021年更加打入南美球會盃決賽，所以管理層視南美賽事資格係基本任務，未計今輪賽事，巴拉干天奴紅牛排13，只差一位就可以踢下屆南球盃，當然會搶分。巴拉干天奴紅牛主場成績唔曳，近7場聯賽主場不敗，近4主場則錄得1勝3和，今場就坐鎮主場挑戰傳統力量山度士。


對上7次碰頭6打和
山度士上場大炒青年人4比1，終止兩連敗，球隊經過一排沉淪後，終於殺番入前12名。19歲巴西新星馬高斯李安納度又有進帳，佢已經喺聯賽射入11球，有望繼續取得士哥，今場兩隊狀態及鬥志都不俗，翻查紀錄，兩軍近7次交手，竟然6次打和，今場不妨冷敲和波，山度士作客受讓，讓球客勝亦相當好路。