卡爾萬：皇馬猛藍稱霸全球

安帥精銳盡出不勝無歸！
今晚世界冠軍球會盃重頭戲，由皇家馬德里火併墨西哥勁旅藍十字，「銀河艦隊」近期遇神殺神、遇佛殺佛，創造20連勝紀錄不特止，王牌基斯坦奴朗拿度更加撳都撳唔住，今場對住實力差兩班兼體能蝕晒章嘅藍十字，即使臨時要轉場踢都冇有怕，強捧皇馬1.68倍「讓客」。

（無綫翡翠台及TVB13周三凌晨3:30直播）

今場波原本喺穆雷球場踢，但因為積水問題嚴重，搞到呢場大戰要轉去馬拉喀什球場進行，球場座位少咗接近5,000個，國際足協被迫向部分購票球迷退款。球迷冇得入場睇波當然唔好受，但對皇馬其實冇乜影響，事關佢哋日前喺西甲擊敗艾美利亞，創下20連勝壯舉，賽後主帥安察洛堤更豪言有「義務」捧世冠盃、稱霸全球！係就係寸嘴咗啲，但「銀河艦隊」弗爆係不爭嘅事實，歐聯分組賽全勝首名晉級，西甲壓住巴塞同馬體會高踞榜首，試問點會突然喺世冠盃失威先？

C朗近3戰入6粒 J神基迪拉帶傷出征
再講，世冠盃不嬲係歐洲同南美洲球隊嘅天下，過去10屆僅得馬贊比同拉查體育會兩支非洲兵試過爆冷殺入決賽，其中歐洲代表對上6屆喺準決賽亮相，每場最低限度攻入對手3球。皇馬中場莫迪歷受傷冇隨軍出征，好彩之前有傷在身嘅「J神」占士洛迪古斯、同埋中場悍將基迪拉都有出發去摩洛哥，今鋪可謂精銳盡出，憑住20連勝勁轟75球、C朗近3場斬獲6球嘅氣勢，今場要延續「每場最少入3粒」呢個傳統，話都冇咁易啦！

上輪激戰120分鐘 藍十字體能輸晒
對家藍十字喺半準決賽冒住大雨擊敗西悉尼流浪者，先被攻破大門唔在講，如果唔係對手踢少兩個，呢支中冠盃盟主能唔能夠喺加時反勝，絕對係一大疑問。最弊係佢哋陣中唔少主將都年紀唔細，法奧斯圖賓度、法蘭斯高洛迪古斯、艾斯亞度基文尼斯個個三張嘢有多，中場指揮官兼隊長托拉度更年屆35，喺踢足120分鐘水戰之後，休息短短兩日就要再硬撼皇馬，體能未必恢復得切，今鋪隨時輸鑊甘都似，皇馬「-2」都一樣開到「讓客」。

盤路解碼
以1.5球中位數計，皇馬近22仗開出18口「半場大」。

乜都玩錦囊：撐艦隊「大」晒！
皇馬鋒線無堅不摧，締造20連勝佳績之餘，仲喪入75球，而且歐洲代表過往出戰世冠盃準決賽例牌多入波，對上9屆有8屆每場最少攻入對手3球，今場一於揀埋個入球大，擔定櫈仔睇入球騷啦！

Data King：艦隊場均勁入3.75球
?皇馬20連勝喪轟75球，平均每場入3.75球。

?皇馬近20場勝仗中，開出18次「贏贏」。

?連上場法定時間摸和西悉尼流浪者，藍十字今季11場客戰未贏過。