阿占：澳總決賽阿德「讓主」秤先

澳洲足總盃首個王者將喺今日誕生！決賽戲碼係由今季喺澳職都有好表現嘅阿德萊德聯同珀斯光輝對壘。「阿德」教練甘巴爾喺香港執教傑志嗰陣贏盡錦標，去到澳洲教波，儘管獲得一致好評，但一直未有獎盃落袋，今場若果贏咗個冠軍返嚟，就係證明自己有料嘅好機會。況且阿德今仗喺自己地頭出擊，一於捧3.25倍「讓主」。（有線64及203周二下午4:30直播）

甘巴爾上年執掌阿德萊德聯之後，佢將呢隊表現飄忽嘅球隊，打造成為技術細膩、踢法悅目嘅勁旅。早排傳出佢可能會被日職球隊挖角，如果屬實，呢隻「澳總」可能係佢喺「袋鼠國」捧盃嘅最後機會喇！更何況呢個賽事今年係第一屆舉行，如果甘巴爾帶隊封王，仲可以名留青史添！

兩隊最近一次對賽，「阿德」上月至喺主場以2:0輕鬆贏珀斯光輝，球員心理上可以話佔有優勢。再者今場決賽又抽中喺「阿德」主場舉行，班球員就更加信心十足啦！雖然「阿德」中場奧沙麥馬歷養傷，但對家珀斯光輝同樣有荷蘭中場靴斯缺陣，今場作客未必夠「阿德」砌呀！

頂占筍盤：阿德萊德聯（讓球主勝）