兵疲乏力！熱刺紅軍捱細界|東方日報

英超另一場焦點大戰，熱刺主場對利物浦。熱刺近況欠佳，加上剛於歐聯生死戰前往法國惡鬥完馬賽，球員體力負荷甚大，或會影響今仗發揮。利物浦表現退步，攻力不及以往銳利，考慮到「紅軍」近4場聯賽總入球全開3球或以下嘅走勢，寧願博中位數3.5球入球細。（Now 621及611周一凌晨零時30分直播）

熱刺近期頻頻失利，包括喺聯賽接連不敵兩支前列球隊曼聯及紐卡素，即使對弱隊般尼茅夫，都曾經一度落後兩球，戰至補時先至反勝，表現欠缺說服力。前鋒孫興民上仗歐聯受傷，今仗將會缺陣，單靠哈利卡尼數胡，攻力自然打折扣。加上熱刺近10次對利物浦錄得3和7負劣績，明顯被對手食住，恐怕今仗難佔優勢。

利物浦水準不穩
利物浦今季成績大倒退，近7場聯賽僅兩勝，而且兩場勝仗都係主場贏1比0，近4場聯賽合共只入3球，上仗歐聯更踢到85分鐘先至入波。「紅軍」進攻效率低，好大程度上因為沙迪奧文尼離隊後，破壞咗原本行之有效嘅進攻模式，加上新加盟射手達雲紐尼斯水準不穩，穆罕默德沙拿孤掌難鳴，今仗面對逼搶硬朗嘅熱刺，要組織攻勢，肯定更加舉步維艱，入波機會唔大。