科娜：曼聯6連勝續發維

曼聯6連勝，唔好畀佢停！「王者曼」近期強勢殺上英超第3位，唔係寸緊曼聯，呢隊波依家堅有王者氣色，勁得嚟連運都有埋，後上奪冠不是夢呀！「紅魔鬼」今晚作客阿士東維拉，Easy Job喇，科娜強烈推介客勝！

（now 621周六晚11時直播）

桑馬達終遇「伯樂尹」
曼聯上場對住死敵利物浦，展現出超強反擊能力，雖然一開波「紅軍」個勢比較好，但「紅魔鬼」一個快速反擊就即刻KO對手，用入波打窒對手氣勢，加上神龍迪基亞力挽狂瀾同埋少少嘅運氣，令到曼聯豪取6連勝。

最令曼迷驚喜嘅應該係桑馬達呢匹千里馬終於遇上伯樂尹戈爾，買佢返嚟嘅前領隊莫耶斯上季完全嘥咗佢走位靈活、短傳同控球能力出色呢啲特點，尹戈爾則善用佢嘅優點，派佢同朗尼、尹佩斯喺前場互相走位，拉散對手防守，令桑馬達多咗空位入攝。佢哋3個喺前面走嚟走去，再配合路爾斯華倫西亞同艾舒利楊格嘅兩翼側擊，進攻即刻多元化咗，對方防守球員走甩是但一個都好有可能失波。

阿士東維拉攻力弱得可憐，踢咗16場英超入得10球，係英超攻力最曳球隊，早排仲試過連續5場冇波入，今場又有翼鋒基蘭李察臣停賽，借將湯卡華利亦因借用條款同停賽而冇得倒戈。正所謂久守必失，維拉今場想守住狀態大勇、如狼似虎嘅曼聯唔係咁易，咪諗咁多，一於捧客勝！