黃興桂：皇馬衞冕歐聯睇聖卡斯

歐聯16強日前完成抽籤，對於各隊奪冠或晉級機會，Peter趁機同大家作簡單分析。首先巴塞三叉戟尼馬、美斯及蘇亞雷斯，當然係神奇、頂級、超卓喇，但教練同後防就睇唔通。車路士有前有後四平八穩，唯一係主力夏薩特及迪亞高哥斯達不可缺一。多蒙特教頭高普專攻歐聯，但以佢哋今屆人腳，能闖入4強已經收貨。上屆盟主皇馬實力強橫，但若然續用水準下滑嘅卡斯拿斯把關，蟬聯機會便會降低。前屆冠軍拜仁想捲土重來，就要睇教頭哥迪奧拿功力喇。

馬體會應有驚喜
假如受傷嘅王牌阿古路未能趕及披甲，曼城嚟緊對巴塞出線機會只得兩個：渺茫同冇機會。阿仙奴對摩納哥算係抽到好籤，但Peter覺得兵工廠首回合一定要藉地利搶W，否則就弊傢伙。祖雲達斯雖今非昔比，還好抽到陣容不整嘅多蒙特，相信係五五波。巴黎聖日耳門水頭充足，不過主帥白蘭斯踢得唔教得，如果唔係殺入16強可能烏紗不保。其餘嘅利華古遜、史浩克04、薩克達、波圖，若再進一級已超額完成，唔好忘記仲有上屆亞軍馬體會，在精明少帥施蒙尼帶領下應有驚喜，但好難再躋身決賽。

金句：歐聯16強初步奪標展望逐個捉