法達斯維：望見尾燈雙曼喪追車

曼城靠阿伯破宮
曼市雙雄聖誕快車追「車」！話咁快聖誕節就嚟，粉絲當然唔會錯過精彩刺激嘅英超聖誕快車喇，雖然車路士仲排緊第一，但曼城同曼聯愈追愈近，仲已經望到車「尾燈」添，究竟贏到勒唔住嘅曼市雙雄，能否藉住密麻麻嘅快車賽程，開行Turbo超越車仔呢？隨時成為佢哋爭奪今季聯賽錦標嘅轉捩點。

英超周六早場，二哥曼城將坐鎮主場迎戰水晶宮。「藍月亮」近期大傷「鋒」，王牌射手阿古路同迪斯高統統傷晒，但家有一老、如有一寶，佢哋仲有林柏特、迪米捷利斯等一班經驗豐富嘅老將撐住，其中林伯只要入多粒，便可獨佔英超歷史射手榜四哥之位，撞正傷兵成籮嘅弱旅水晶宮，林伯唔趁機數胡等幾時？「藍月亮」讓球主勝咪錯過。

（now 621周六晚8時45分直播）

曼城雖喺各項賽事取得七連勝，但亦付出好大代價，兩位狀態大勇嘅射手阿古路及祖維迪先後受傷，迪斯高上仗對李斯特城熱身時亦傷埋，結果臨時由小將普素擔正，幸好仲有老將林柏特撐住，憑佢一箭定江山險勝包尾嘅李斯特城，該仗有隊長兼中堅高柏尼傷出，但入替佢嘅另一「阿伯」、快將34歲嘅守將迪米捷利斯頂得兩嘴，充分反映出經驗豐富嘅老將，對現時有唔少傷兵嘅曼城嚟講，絕對起到穩定軍心嘅作用。

林伯入多粒獨享「四哥」
唔好睇林柏特已經36歲，佢今季聯賽嘅四個入波，為曼城帶來3勝1和嘅10分，上仗對「李城」嘅入波係佢喺英超嘅第175球，追平啱啱宣布掛靴嘅阿仙奴名宿亨利，並列英超歷史射手榜第四位，只要林伯今仗再有進帳，便可獨佔四哥之位。況且對手「飛鷹」水晶宮近8仗贏得1場咁大把，繼續喺下游掙扎，最弊係箭頭查馬克受傷要抖到下個月，同翼鋒韋費特沙夏及守將馬里亞柏齊齊倦勤，連唯一反擊力都冇埋，睇番佢哋嚟緊會對跌晒Watt嘅修咸頓、昆士柏流浪及阿士東維拉，搶分把握更大，無謂喺今仗嘥力喇，相信曼城可輕取呢隻「鷹」，簡單捧讓球主勝。