德甲歇冬前最後一夜，有場哈化柏林主場迎戰賀芬咸，論實力，賀芬咸明顯高一籌，熱捧1.53倍「讓客」啦！ （有線61、64、201及203周日晚10:30直播） 賀芬咸上半季整體演出好過哈化柏林多多聲，今場受讓嘅主要原因，係佢哋最近3場作客波都輸晒，不過大家留意番，賀芬咸「作客3連敗」之旅，對手其實係慕遜、拜仁同多蒙特，輸波非戰之罪，睇埋呢班波再之前嗰4場作客聯賽有1勝3和，可見等閒球隊未必贏到佢哋。最重要係賀芬咸前鋒禾蘭最近回勇，被德國傳媒視為國家隊希望，依家梗係要騷吓「哥利」啦！ 主場嘅哈化戰績飄忽，可以贏到禾堡同多蒙特，同時亦可以失分畀不來梅同緬恩斯，今場佢哋仲有中場鮑祖漢、史托卡、後衞柏頓赫特、施巴斯坦蘭甘同門將謝斯碧克等傷兵，邊讓得起賀芬咸呀？ 頂占筍盤：賀芬咸（讓球客勝）