張健峰：馬體會啃唔落畢爾包

今晚西甲有場唔錯嘅戲碼，由畢爾包主場迎戰馬德里體育會。兩軍今季同樣參戰歐聯，但係命運迥異。畢爾包季初狀態未起，導致歐聯早早出局，聯賽仲試過跌落降班區添！好在，畢爾包已經回復上季水準，戰績回升，加上今晚主場出擊，有力喺跌晒Watt嘅馬體會身上搶分，主隊受讓1球，1.65倍「讓主」值得一試。

（now632台周一凌晨4:00直播）

畢爾包回勇（目及）實蒙尼恩
其實畢爾包保留咗上季大部分人腳，戰鬥力唔會話差太遠嘅，只係老將米基聖荷西所領導嘅防線，季初真係冇乜態，搞到成隊波戰績插晒水。好彩，踏入11月後，畢爾包班人明顯操番弗，防守力大幅升呢，近11場比賽，仲錄得6勝3和2負佳績添，最難得係米基聖荷西仲周不時後上助攻有斬獲，狀態返晒嚟，靠得住！

冇錯，雖然畢爾包今仗有守將伊拉奧拿養傷，不過呢班波勝在板櫈深度唔曳，巴倫斯加、奧爾迪尼斯都係有質素嘅後生仔，上仗對皇蘇入咗球靚波嘅迪馬高斯，仲有技術全面嘅蒙尼恩，近排狀態都幾好，大家今晚睇波，記得留意呢幾位新星喇，隨時有驚喜o架。

馬體會近3仗不勝士氣曳
對家馬體會啱啱相反，上周聯賽主場對維拉利爾，先有前鋒文迪蘇傑食詐胡，完場前仲被客軍嘅韋圖一箭定江山，保唔住19個月嘅主場不敗紀錄，士氣大受打擊之餘，食胡箭頭文迪蘇傑及中場佐治高基仲要停賽，況且馬體會近3仗不勝，狀態明顯回落，今鋪作客畢爾包莫講話要贏，分分鐘連1分都拎唔到！