阿占：「阿德」鬥和波專家讓唔起 博FC悉尼「讓主」冇死

聖誕快樂！雖然好多聯賽都歇冬，不過今日繼續由澳職陪大家過節。FC悉尼會喺主場迎戰阿德萊德聯，兩個禮拜前攞完澳洲足總盃嘅阿德萊德聯，表面睇牌面好似較高，不過佢哋作客成績麻麻，對住今季澳職「和波專家」FC悉尼未必贏到，主隊受讓梗係要捧1.52倍嘅「讓球主勝」啦！

（有線64及203周五下午4:45直播）

甘巴爾炒荷西卡斯奧 阿德萊德聯士氣唔慌好
FC悉尼聖誕節收到噩耗，後衞奧尼洛夫斯基因傷提早收咧，好在佢哋亦有隊長保斯基有望克服鼠蹊傷患復出，成班波戰鬥力應該冇太大影響。查實FC悉尼目前雖然只排中游，但佢哋失分主因係和波太多，11場聯賽足足和咗5場，心水清嘅球迷計一計，其實悉尼今季連埋盃賽在內只係輸過2次咋！

阿德萊德聯捧完足總盃後，上場聯賽輸波強勢遭打斷，而且教練甘巴爾仲公開批評因傷長抖嘅荷西卡斯奧唔合群，唔肯恭賀其他隊友，前日更加宣布同呢位巴西老將解約，士氣又點會好呢？睇番兩隊波近6次對賽，阿德萊德聯只係贏過2次，今場睇嚟好大機會再失分，FC悉尼受讓必撐。

頂占筍盤：FC悉尼（讓球主勝）