李榮基：基奧特停賽 玩謝雲格

阿仙奴尋日凌晨擊敗昆士柏流浪，領隊雲格喺拆禮物日總算收份大禮，取得執教英超第400場勝仗及執教「兵工廠」所有賽事嘅600場勝利。雲格喺英超嘅戰績排行榜可謂傲視同儕，僅次於收咗山嘅費格遜，可惜教授嘅大好心情卻被基奧特徹底破壞。

對住QPR，大家都以為「兵工廠」可以贏得輕鬆，但早段12碼宴客，令一眾球員愈趨急亂，好在阿歷斯山齊士喺完半場前破關，幫隊友紓緩唔少壓力。點知基奧特嘅鹵莽領紅，搞到班波形勢急轉直下，最後30分鐘要飽受壓力捱到尾，相比同日其他勁旅車路士及曼市雙雄，阿仙奴球員要消耗更多體能嚟換取3分。

韋斯咸空襲 中正阿仙奴死穴
由於基奧特嘅領紅起碼停賽3場，搞到教授要為如何排陣迎接緊密賽程大傷腦筋，一般估計有兩個解決方案，第一係將韋碧克移入中路打正箭頭，以近況都不俗但鮮有機會嘅普多斯基打左翼鋒，藉以安撫一下王子嘅不滿情緒；其二係用傷愈嘅禾確特而棄用普多斯基，但呢個方案亦會衍生兩大風險，一嚟禾確特狀態未足，玻璃腳隨時有再傷危機，二嚟會加速普多斯基嘅離隊，除非雲格真係決意放棄王子，咁樣選擇方案二嘅機會先會較大。

僅隔一日今晚又要再度出戰，除咗體能及排陣外，「兵工廠」作客韋斯咸仲有一大隱憂，就係防守死球嘅死穴。要知道「錘仔幫」嘅死球戰術向來厲害，一對中堅占士哥連斯、艾朗加斯威爾同埋空中霸王安祖卡路爾嘅空襲，今季先後令曼城、利物浦吃盡苦頭，再者阿仙奴嘅區域聯防已被對手屢次突破，如果未能及時改善，隨時會敗走烏普頓公園。（now623台周日晚11:00直播）