護級戰最緊要頂住 列斯聯半和扑錘|東方日報

聯賽5連敗嘅韋斯咸，作客列斯聯爆發護級大戰！列斯聯啱啱悶和紐卡素，但佢哋近5次對倫敦球隊輸晒，心理上難免較輸蝕，兩軍都冇贏波嘅把握，唔輸對大家嚟講都係好結果，預料雙方半場都會踢得較謹慎，謀定而後動，今場一於捧半場和。（Now 623周四凌晨3時45分直播）

莫耶斯再輸執包袱

歐協聯殺入淘汰賽嘅韋斯咸，喺英超情況啱啱相反，17戰4勝2和11負，快車尾輪前排尾4，僅以得失球差壓過尾3嘅諾定咸森林。「錘仔幫」由10月尾開始，接連輸畀曼聯、水晶宮、李斯特城、阿仙奴同賓福特，領隊莫耶斯更成為下任被炒大熱，今場再輸真係好大鑊。

主場嘅列斯聯經過幾場大開大合嘅賽事後，上場作客成功悶和紐卡素，能夠拎走1分絕對係大成就，佢哋暫時領先韋斯咸兩分排14位，護級壓力同樣大。最大鑊嘅係，今季佢哋面對倫敦球隊成績差到爆，5場聯賽輸晒，今場未必敢輕舉妄動，既然兩軍都怕輸，預計踢法都係偏向防守性，半場和係最佳選擇。