蘇斯黑柴 ：卡塔爾唔夠伊朗砌

攻守都曳 門將成笑柄
Ｃ組分組賽第二輪今午西亞球隊大混戰，尾場卡塔爾惡鬥伊朗，卡塔爾首輪慘敗於阿聯酋腳下表現完全唔對辦，面對同組最強隊伍伊朗勢難轉弱為強，伊朗只讓半一撐上盤。

（now 671周四下午5時直播）

卡塔爾本土球員水準一向唔高，但勝在有錢財可通神，國家足總訂下招納海外人才歸化方針，吸納好多非洲及南美兵入籍，目標瞄準已獲主辦權嘅2022世界盃。呢班僱傭兵目前仍未成熟，雖然喺去年11月嘅海灣盃以半冷身份奪冠，但五場比賽只贏兩場，過程相當僥倖。嚟到亞洲盃決賽周更明顯準備不足，首仗對阿聯酋輸1比4攻守表現一無是處，尤其門將貝漢接二連三送大禮成為笑柄。大敗過後，卡塔爾今仗要面對經過世盃決賽周磨練、首戰演出穩定嘅同組大熱伊朗，相信更難偷雞。

阿聯酋讓得起巴林
至於頭場巴林對阿聯酋係爭奪次名出線嘅重頭戲（now 671周四下午3時直播），巴林首仗吞伊朗兩蛋，但演出獲一致好評，上半場更佔得上風，令唔少人對佢哋有憧憬，不過呢班波近年下滑明顯，最大問題係攻力太弱，唔計熱身賽，喺過去14個月來所有9場正式賽事（包括西亞足球錦標賽、亞洲盃外圍賽、海灣盃同上場亞洲盃決賽周）竟然一球都未入過；相反阿聯酋攻守實力更平均，一條防線喺國內聯賽應付慣一批貴價優質嘅星級外援前鋒，前線由奧馬鴨都拉文、阿密特卡利同穆巴奧特組成嘅攻擊鐵三角無論喺海灣盃同今屆賽事都顯示威力非凡。今場巴林和都唔掂要焗攻，阿聯酋有力同伊朗攜手取得連捷，同樣讓半一都係揀上盤。