張健峰：華倫西亞成肚火 搵艾美利亞出氣

華倫西亞會喺今晚西甲主場迎戰艾美利亞，前者周中西盃次回合作客愛斯賓奴輸0:2，兩回合合計以2:3出局收場。其實西班牙盃出局對「蝙蝠兵團」嚟講或者係一件好事，可以專心喺聯賽爭奪歐聯入場券。今晚對手只係尾4嘅艾美利亞，仲有主場之利，梗係撐華倫成功反彈，要1.82倍「讓主」啦！

主場戰績西甲第2
「蝙蝠兵團」暫時喺聯賽榜排第5，較第4位嘅西維爾少1分，要爭逐前4，主場對榜下游球隊就唔可以手軟。事實上，華倫今季喺自己地頭出擊戰績優異，戰績僅次於巴塞隆拿，早前仲擊敗22連勝嘅皇家馬德里，真係威過威士忌！華倫前線有當打嘅尼格度，仲有今季當紮嘅小伙子柏高艾卡沙，火力強勁，對住艾美利亞條豆腐防線，要入兩、三球唔難。

艾美利亞踏入2015年第一場比賽就作客擊敗馬拉加，係威係勢！點知之後無以為繼，錄得1和2負，一球都無入過。話就話波係圓啫，艾美利亞近況唔好，實力亦唔夠，仲要今晚作客，真係好難捧得落手喎！