各取1分攜手出線 畿內亞埃及以和為貴_東方日報

將於周四凌晨上演嘅非國盃外圍賽，D組畿內亞對埃及值得留意，今仗喺中立場摩洛哥舉行，由於雙方打和就可以攜手出線，被指將會踢「默契波」，加上埃及隊長穆罕默德沙拿同畿內亞隊長拿比基達喺利物浦合作多年，睇嚟的確好大機會「以和為貴」。（Now 638周四凌晨2時直播）

畿內亞同埃及現時都有9分在手，同組另外兩隊馬拉維、埃塞俄比亞都係得3分，由於僅餘下兩輪外圍賽，所以今仗畿內亞對埃及，打和各取1分，就可以提早篤定一齊出線，兩隊有充分誘因踢「默契波」。更何況雙方隊長穆罕默德沙拿、拿比基達曾於利物浦做咗5年隊友，雖然拿比基達早前約滿離開紅軍，轉投雲達不來梅，但佢同沙拿仍然非常老友，今仗絕對「有偈傾」。

中立場作賽冇球迷壓力
即使撇除「默契波」及「友情」因素，畿內亞同埃及實力亦非常接近，兩隊首循環交鋒，埃及就算有主場之利，都要踢到87分鐘，先至入波小勝1比0，今仗去到中立場摩洛哥比賽，大家都冇主場球迷壓力，歎慢板都唔怕被噓，和味相當濃。