U21歐國盃：後防傷兵多德國U21搶攻大顯身手_東方日報

另一場C組首輪賽事，由德國U21對以色列U21。衞冕嘅德國U21未開波已傷兵滿營，後防更屬重災區，好彩仲有射手尤素法莫高高撐住，對住實力麻麻嘅以色列U21，隨時以攻代守，2.5球入球大乃明智之選。

（Now 633周五凌晨零時直播）

尤素法莫高高領軍超班
德國U21近3屆全部打入決賽，獲得兩冠一亞，戰績彪炳。不過佢哋今屆同大國腳一樣行緊衰運，未開波已頻傳壞消息，其中後防更係重災區，貝拿高卓普、卡達巴治及佐敦拜爾等主力先後因傷落選，可能要搵馬頓戴達夥拍恩比錫克扼守中路，但兩人冇乜點夾過，防守都幾牙煙。

除傷兵滿營外，原本效力德國U21嘅馬利克迪爾文同沙馬迪錫，分別轉籍改投美國同塞爾維亞，實力受削。結果德國U21從大國腳召回尤素法莫高高助陣，呢位多蒙特小將「降呢」後確係超班，佢只為U21踢5仗已勁入6粒，上屆因傷錯過捧盃，揚言要喺今屆補償。

以色列U21實力平平無奇，僅靠附加賽打入決賽周，計埋2013年主辦嗰屆，今次係佢哋第二次進身決賽周，近4仗只得2和2負狀態未谷起，而且外圍賽又係同德國U21同組，兩循環都輸晒，擺明未夠班。不過顧及德國U21人腳不整，主Ｗ又嫌冇肉食，既然佢哋近4仗3次開3球或以上，一於轉玩大盤。