女世盃：日本托弗讓得起瑞典_東方日報

今日下晝女世盃8強大戰，日本女足火併瑞典女足。日本女足弗到漏油，連熱身賽在內5連勝，瑞典女足上仗贏美國女足搏到盡未回氣，以逸待勞嘅「大和撫子」必乘勝追擊，小讓平半撐上盤。

（Now 630周五下午3時30分直播）

日本女足今屆女世盃表現突出，分組賽3場贏晒，包括豪贈奪標熱門西班牙女足4蛋，去到16強又以3比1輕取另一支歐洲勁旅挪威女足，氣勢如虹。

近5場全勝狂轟19粒
連同開幕前熱身賽炒巴拿馬女足5粒，日本近5仗全勝兼狂轟19粒，進攻中場宮澤日向喺今屆4仗女世盃入5球，位居射手榜榜首，前鋒田中美南亦貢獻3個助攻，佢哋快速反擊打法非常煞食。

另邊廂，瑞典女足亦非善男信女，今屆女世盃3仗分組賽全勝，去到16強面對衞冕嘅美國女足完全處於下風，幾經辛苦先守足120分鐘悶和0:0，去到互射12碼更峰迴路轉，射到第7輪先藉住門線技術險勝，不過眾將搏到盡已疲態畢露，面對早一日比賽兼毋須加時嘅「大和撫子」，明顯輸蝕，寧買當頭起，一於捧日本上盤。